BAKI, AzerVoice, Orxan Qədirzadə
Türkiyə Müdafiə Nazirliyi bəyan edib ki, Türkiyə Silahlı Qüvvələri Suriyanın şimalında “Suriya Demokratik Qüvvələri” (SDQ) tərəfindən qazılmış 702 kilometr uzunluğunda tunelləri məhv edib.
AzerVoice xəbər verir ki, Ankara həmçinin SDQ -nin martın 10-da Dəməşqlə imzaladığı razılaşma çərçivəsində Suriya dövlət institutlarına inteqrasiyanı həyata keçirməli olduğunu xatırladıb.
Nazirliyin sözçüsü Zəki Aktürk cümə axşamı keçirilən həftəlik brifinqdə bildirib ki,“Silahlı Qüvvələrimiz terrorizmə qarşı mübarizəni qətiyyətlə davam etdirir, sərhədlərimizi qoruyur. Bu çərçivədə Suriyanın şimalındakı ‘Fərat qalxanı’, ‘Zeytun budağı’ və ‘Sülh çeşməsi’ əməliyyat bölgələrində mağara, sığınacaq və tunellərin axtarışı davam edib.”
O qeyd edib ki, “YPG”nin nəzarətindəki ərazilərdə tikilmiş tunellər tamamilə məhv edilib.
“8 dekabr 2024-dən etibarən Tel-Rifatda 302 kilometr, Münbiçdə isə 400 kilometr olmaqla ümumilikdə 702 kilometrlik tunel sistemi dağıdılıb.”-deyə o bildirib.
Nazirlik nümayəndəsi bildirib ki, Suriya hökuməti və onun bütün qurumları ölkədə sabitliyi və təhlükəsizliyi bərpa etmək istiqamətində intensiv fəaliyyət göstərir.
Onun sözlərinə görə, Türkiyə və Suriya müdafiə nazirlikləri arasında 13 avqust 2024-cü ildə Ankarada imzalanmış hərbi əməkdaşlıq memorandumuna əsasən, iki ölkə arasında təlim, texniki məsləhət və müdafiə dəstəyi proqramları həyata keçirilir.
Rəsmi mənbəyə görə, Ankara SDQ - nin Suriya ordusuna və dövlət institutlarına inteqrasiyası prosesini yaxından izləyir, bu məsələnin “Suriya dövlətinin siyasi və ərazi bütövlüyü üçün həyati əhəmiyyət daşıdığını” vurğulayır.
“Terror təşkilatı ‘SDQ Suriyanın birliyini təhdid edən hər cür fəaliyyət və ritorikadan əl çəkməlidir,” - deyə nazirlik rəsmisi bildirib.
Türkiyə tərəfi “bir dövlət, bir ordu” prinsipinə sadiq qalaraq Dəməşqlə sıx əməkdaşlığın davam etdiriləcəyini vurğulayıb.
Türkiyə parlamentindən yeni mandat
Aktürk bildirib ki, Türkiyə parlamenti 30 oktyabrdan etibarən qüvvəyə minməklə Suriya və İraqa qoşun göndərmə mandatını üç il müddətinə uzadıb.
Prezident Rəcəb Tayyib Ərdoğan ötən həftə parlamentə müraciət edərək bu səlahiyyətin uzadılmasını təklif etmişdi.
Prezidentin təqdim etdiyi sənəddə qeyd olunur ki,“Türkiyənin cənub sərhədləri boyunca davam edən terror təhdidi və bölgədə daimi sabitliyin bərqərar olmaması milli təhlükəsizlik üçün risk yaradır.”
Sənəddə həmçinin vurğulanır ki, PKK, PYD/YPG və İŞİD kimi təşkilatlar hələ də Suriyada mövcuddur və Türkiyənin milli təhlükəsizliyinə ciddi təhdid yaradır.
BMT-də “QSD”yə xəbərdarlıq
Türkiyənin BMT-dəki daimi nümayəndəsi Əhməd Yıldız BMT Təhlükəsizlik Şurasının iclasında bəyan edib ki,
“PKK/YPG bölgədə ideoloji və repressiv davranışlarını davam etdirir, yerli icmaların etirazına səbəb olur.”
Diplomat xüsusilə xristian məktəblərinin bağlanmasını və məcburi kürd tədris proqramlarının tətbiqini tənqid edib.
Yıldız martın 10-da Dəməşqlə imzalanmış inteqrasiya sazişinin icrasının vacibliyini və Suriyanın şimal-şərq vilayətlərinin mərkəzi hökumətin inzibati və təhlükəsizlik nəzarətinə qaytarılmasının zəruriliyini vurğulayıb.
“Suriya üzərində qalan sanksiyalar aradan qaldırılmalı, ölkənin suverenliyi və ərazi bütövlüyü qorunmalıdır,” – deyə Yıldız əlavə edib.