BAKI, AzerVoice

Avropa İttifaqı Suriyaya qarşı iqtisadi sanksiyaları rəsmi olaraq ləğv edib.

AzerVoice xəbər verir ki, Avropa İttifaqı (Aİ) Suriyaya qarşı tətbiq etdiyi bəzi iqtisadi sanksiyaların rəsmi olaraq ləğv edildiyini açıqlayıb.

Aİ Şurasının yaydığı məlumatda bildirilir ki, bu qərar 20 mayda keçirilmiş Aİ Xarici İşlər Nazirləri Toplantısında qəbul edilib və yaxın vaxtlarda Rəsmi Qəzetdə dərc olunacaq.

Qərara əsasən, Suriya Mərkəzi Bankı da daxil olmaqla banklar, neft, pambıq və telekommunikasiya sektorlarında fəaliyyət göstərən şirkətlər, eləcə də 24 media qurumu sanksiya siyahısından çıxarılıb. Aİ-nin Xarici Əlaqələr və Təhlükəsizlik Siyasəti üzrə Ali Nümayəndəsi Kaja Kallas bu addımı “Suriyanın bərpasına və siyasi keçidə dəstək üçün tarixi bir qərar” kimi dəyərləndirib.

Qeyd edək ki, Aİ Bəşər Əsəd rejimi ilə birbaşa əlaqəsi olan şəxslərə və qurumlara qarşı sanksiyaları isə 2026-cı ilin iyun ayınadək uzadıb. Mart ayında Latakiyada baş verən insan hüquqları pozuntularına görə iki şəxs və üç təşkilata qarşı yeni sanksiyalar tətbiq edilib. Aİ rəsmiləri Suriyada qeyri-sabitlik və hüquq pozuntularına səbəb olan tərəflərə qarşı əlavə tədbirlərin mümkün olduğunu istisna etmirlər.