BAKI, AzerVoice
ABŞ-ın Suriya üzrə xüsusi nümayəndəsi Tomas Barak bu gün Suriyanın paytaxtı Dəməşqə səfər edib.
AzerVoice xəbər verir ki, bu, 13 ildən
sonra ABŞ-dan Suriyaya ilk yüksək səviyyəli diplomatik səfər kimi
tarixə düşür.
Barak səfəri zamanı ABŞ səfirinin Dəməşqdəki iqamətgahında
keçirilən bayraq qaldırma mərasimində iştirak edib.
Suriya Xarici İşlər və Mühacirlər naziri Əsəd Həsən əl-Şaibani ilə birgə iqamətgahın rəsmi açılışını edən Barak, iki ölkə arasında münasibətlərdə yeni səhifənin açıldığını bildirib. Xatırladaq ki, ABŞ-ın Suriyadakı sonuncu səfiri Robert Ford idi və o, 2011-ci ildə Bəşər Əsəd hakimiyyətinə qarşı etirazlar fonunda ölkədən geri çağırılmışdı.
ABŞ prezidenti Donald Trampın Barakı rəsmi olaraq Suriya üzrə xüsusi nümayəndə təyin etməsindən bir neçə saat sonra baş tutan səfər, Vaşinqtonun Suriyanın yeni rəhbərliyi ilə münasibətləri bərpa etmək cəhdləri kimi qiymətləndirilir. “Barak ekstremizmi dayandırmaq və Yaxın Şərqdə sülhə nail olmaq üçün böyük potensiala malikdir.” - deyə Tramp ABŞ Dövlət Departamentinin X platformasındakı paylaşımında deyib.
Barakın təyinatı və səfəri, Trampın mayın 14-də Ər-Riyadda Suriya prezidenti Əhməd əl-Şaara ilə görüşündən və sanksiyaların ləğvini elan etməsindən sonra baş verib. Həftə sonu İstanbulda keçirilən görüşdə Barak əl-Şaara və əl-Şaibani ilə də bir araya gəlib.
Qeyd edək ki, ABŞ və Suriya arasında münasibətlər 2011-ci ildə vətəndaş müharibəsinin başlanması və ABŞ-ın Bəşər Əsədə qarşı sanksiyalar tətbiq etməsindən sonra pisləşmişdi. ABŞ diplomatik heyətinin Dəməşqə geri dönməsi münasibətlərin normallaşmasında mühüm addım kimi qiymətləndirilir.
