BAKI, AzerVoice
İŞİD terror təşkilatı, Suriyada Bəşşar Əsədin qaçmasından sonra qurulan yeni hökumət qüvvələrinə qarşı ilk hücumun məsuliyyətini öz üzərinə götürdüyünü elan edib.
AzerVoice xəbər verir ki, bu barədə Suriya İnsan Haqları Müşahidə Mərkəzi və terror fəaliyyətlərini izləyən "SITE Intelligence Group" məlumat yayıb.
Təşkilatın yaydığı bəyanatda, "xilafət” əsgərləri tərəfindən əvvəlcədən yerləşdirilən partlayıcının, mürtəd Suriya rejiminə məxsus avtomobili hədəf aldığı" bildirilib. Hücum ölkənin cənubundakı Süveyda vilayətində baş verib.
Müşahidə Mərkəzi və SITE bu hadisənin Suriya hökumətinin yeni quruluşuna qarşı İŞİD-in ilk rəsmi hücumu olduğunu vurğulayıb. Məlumata görə, hadisə zamanı yeni Suriya ordusunun 70-ci briqadasından bir nəfər ölüb, üç hərbçi isə yaralanıb. Hücum çərşənbə günü məsafədən idarə olunan mina ilə həyata keçirilib.
2014-cü ildə Suriya və İraqda geniş əraziləri ələ keçirən İŞİD, 2019-cu ildə əsasən ABŞ-ın rəhbərlik etdiyi beynəlxalq koalisiya qüvvələrinin səyi ilə Suriyada məğlub edilmişdi. Buna baxmayaraq, təşkilat ölkənin səhralıq bölgələrində fəaliyyətini davam etdirir.
Suriyada yeni hökümətin hakimiyyətə gəldiyi dövründə İŞİD -in bu bölgələrdəki hücumları nadir hallarda qeydə alınsa da, təşkilat şimal-şərqdəki kürd qüvvələrinə qarşı hücumlarını davam etdirir.
Suriya rəsmiləri bu həftə paytaxt Dəməşq yaxınlığında İŞİD -ə bağlı bir hüceyrənin üzvlərini həbs etdiklərini və onların terror aktları hazırladığını bildirib. Hələbdə keçirilən əməliyyat zamanı isə Suriya təhlükəsizlik qüvvələrinin bir üzvü və təşkilatın üç döyüşçüsü öldürülüb.
ABŞ Prezidenti Donald Tramp bu ay Səudiyyə Ərəbistanının paytaxtı Ər-Riyadda Suriya Prezidenti Əhməd Şəraa ilə görüşündə, İŞİD -in yenidən güc toplamasının qarşısını almaq üçün ABŞ-a dəstək verməyə çağırıb.
