BAKI, AzerVoice
İngiltərənin Çelsi klubu Barselonanın alman qapıçısı Mark-Andre Ter Ştegenin transferini gündəminə alıb.
AzerVoice xəbər verir ki, Milan klubunda çıxış edən Mayk Menyanla razılaşma əldə edə bilməyən Çelsi, indi diqqətini 32 yaşlı Ter Ştegenə yönəldib.
Bildirilir ki, London təmsilçiləri alman futbolçunun vəziyyəti ilə maraqlanmaq üçün artıq rəsmi şəkildə Barselona ilə əlaqə saxlayıb.
Kataloniya klubunun Ter Ştegenin transferinə isti yanaşdığı deyilir. Səbəb kimi isə klubun maliyyə yükünü azaltmaq niyyəti göstərilir.
Barselona yaxın günlərdə qapı xəttini gənc qapıçı Joan Qarsia ilə gücləndirib və keçmişdə Yuventus və Arsenalda çıxış etmiş Vojçex Şesnini də ehtiyat qapıçı kimi saxlayır. Bu isə Ter Ştegenin əsas heyətdəki mövqeyini sual altına salıb.
Məlumata görə, Mançester Yunayted də Ter Ştegenlə maraqlanır. Klubun baş məşqçisi Ruben Amorim, hazırkı qapıçı Andrey Onananın uzunmüddətli uyğunluğu ilə bağlı tərəddüd içindədir. Əgər Mançester Yunayted rəsmi təkliflə çıxış etsə, Çelsi ciddi rəqabətlə üzləşə bilər.
