BAKI, AzerVoice, Nərmin Ağayeva
ABŞ prezidenti Donald Tramp kosmik sənayedə məhdudiyyətlərin azaldılması və lisenziyalaşdırma proseslərinin sadələşdirilməsi üçün icra sərəncamı imzalayıb.
AzerVoice xəbər verir ki, sənədə əsasən nəqliyyat nazirinə kosmik buraxılış və yenidən giriş lisenziyaları üçün ekoloji yoxlamaları sürətləndirmək və ya ləğv etmək tapşırılıb. Məqsəd 2030-cu ilə qədər yeni kosmik fəaliyyətlərin və buraxılış tezliyinin artırılması ilə ABŞ-ın kosmosdakı mövqeyini möhkəmləndirməkdir.
Bəyanatda bildirilib ki, köhnəlmiş və məhdudlaşdırıcı qaydalar ləğv olunacaq, kommersiya lisenziyası və icazə prosesləri sadələşdiriləcək. Kosmos limanı layihələrinin qiymətləndirilməsi ticarət nazirinə həvalə ediləcək və bu proses Müdafiə, Nəqliyyat Departamentləri, eləcə də NASA ilə əlaqələndiriləcək.
Qeyd edək ki, mövcud icazə prosedurlarının innovasiyaları ləngitdiyi və kiçik şirkətlərə zərər verdiyi vurğulanıb. Kosmik Ticarət İdarəsinin statusu artırılaraq birbaşa ticarət nazirinə tabe ediləcək.
