BAKI, AzerVoice, Səməd Əyyubov
İngiltərə Premyer Liqa klublarından “Mançester Yunayted” Braziliyanın “İnternasional” klubunun gənc hücumçusu Rikardo Matiasla maraqlanır.
AzerVoice-un məlumatına görə, Premyer Liqa təmsilçisi 19 yaşlı futbolçunu izləmək üçün Marakana stadionuna skaut heyəti göndərib.
Həftə içi keçirilən oyunda ehtiyatdan meydana daxil olan Matias, “Mançester Yunayted”in skautu, keçmiş futbolçu Karlos Alberto Torresin oğlu Aleksandre Torresin diqqətini çəkib. O, rəsmi tapşırıqla klub adından tribunada olub.
“Yunayted”in marağından əvvəl də Matias artıq Avropanın böyük klublarının və yerli investorların diqqət mərkəzinə düşmüşdü. PSV “Eyndhoven” onu Erediviziyaya (Eredivisie) gətirmək üçün cəhd göstərib, iki braziliyalı investisiya qrupu isə oyunçunun hüquqlarını almaq istiqamətində addımlar atıb. Lakin bu təşəbbüslərin heç biri konkret transferlə nəticələnməyib. Premyer Liqadan adı açıqlanmayan başqa bir klub isə artıq ciddi marağını göstərmək üçün məktub göndərib.
Qeyd edək ki, Matias, olduqca sürətli və çevikdir. Onun oyun üslubu tez-tez Robert Levandovskiyə bənzədilir. “Bavariya”nın ulduzu kimi Matias da boş sahə yaratmaq, geri çəkilib top almaq və komanda yoldaşları ilə uyğun şəkildə oynamaq baxımından yetərincə bacarıqlıdır.
Matius 2022-ci ildə “Nova İquaçu”dan “İnternasional”a keçdikdən sonra məhdud oyun şansı qazansa da, müsbət təəssürat yaradıb. Porto Aleqre təmsilçisində 17 əsas komanda oyununda iştirak edib və 3 qol vurub.
