BAKI, AzerVoice, Səməd Əyyubov – İspaniyanın “Barselona” futbol klubu Almaniya yığmasının qapıçısı Mark-Andre ter Ştegendən tibbi arayışı imzalamaqdan imtina etdiyi üçün onu kapitanlıqdan məhrum edib.
AzerVoice xəbər verir ki, bu barədə klubun mətbuat xidməti məlumat yayıb.
Disiplin araşdırması başa çatana qədər “Barselona”nın kapitanı Uruqvaylı müdafiəçi Ronald Arauho olacaq.
Ter Ştegen daha əvvəl belindən əməliyyat olunduğunu və bərpa prosesinin təxminən üç ay çəkəcəyini açıqlamışdı. Lakin o, klubun İspaniya çempionatının tibbi komitəsinə təqdim edə biləcəyi tibbi arayışı imzalamaqdan imtina edib. Əgər bərpa müddəti dörd ay olaraq qiymətləndirilsəydi, klub mövsüm üçün əlavə qapıçı olaraq “Espanyol”dan transfer olunmuş Joan Qarsiyanı qeydiyyatdan keçirə bilərdi.
Bundan sonra “Barselona”nın ter Ştegenə qarşı intizam işi başladacağı və məsələni məhkəməyə çıxaracağı bildirilmişdi. Lakin İspaniya Futbolçular Assosiasiyası klubun qapıçını cəzalandırmaq üçün hüquqi əsaslarının olmadığını bəyan etmişdi.
“Mundo Deportivo” qəzetinin məlumatına görə, ter Ştegen klubdan narazıdır. Belə ki, məşqçilər heyəti ötən mövsümün sonunda onu bilərəkdən meydana buraxmayıb ki, müəyyən sayda oyunda iştiraka görə nəzərdə tutulan 3,5 milyon avro bonus ödənilməsin.
Qeyd edək ki, 33 yaşlı ter Ştegen 2014-cü ildən “Barselona”da çıxış edir. O, klubla 422 matçda iştirak edib və bu oyunların 175-də qapısını toxunulmaz saxlayıb. Qapıçı altı dəfə La Liqa və İspaniya Kubokunu, iki dəfə Superkuboku, bir dəfə isə UEFA Çempionlar Liqası, UEFA Superkuboku və Klublararası Dünya Çempionluğunu qazanıb. Almaniya yığması ilə 2017-ci ildə Konfederasiyalar Kubokunun qalibi, 2016-cı il Avropa Çempionatının isə bürünc mükafatçısı olub.