BAKI, AzerVoice, Səməd Əyyubov
“Kristal Pelas” klubu İngiltərə Superkuboku matçında penaltilər seriyasında “Liverpul”u məğlub edib.
AzerVoice xəbər verir ki, oyun Londonun “Uembli” stadionunda keçirilib.
Matçın əsas vaxtı 2:2 hesabı ilə başa çatıb. “Kristal Pelas”ın heyətində Jan-Filipp Mateta (17-ci dəqiqə, penalti) və İsmaila Sarr (77) fərqləniblər. “Liverpul”un qollarını Uqo Ekitike (4) və Ceremi Frimponq (21) vurub. Penaltilərdə “Kristal Pelas” 3:2 hesabı ilə üstün olub.
Ekitike və Frimponq “Liverpul”dakı ilk rəsmi oyunlarında debüt qollarını vurublar. Frimponq may ayında Almaniyanın “Bayer” Leverkuzen klubundan transfer olunub və ötən il Bundesliqa çempionu olub. Ekitike isə iyulda Almaniyanın “Ayntraxt” klubundan keçib.
Qeyd edək ki, “Kristal Pelas” tarixində ilk dəfə İngiltərə Superkubokunu qazanıb. “Liverpul” isə bu titulu 16 dəfə qazanıb və bu göstəricidə yalnız “Arsenal”a (17) və “Mançester Yunayted”ə (21) uduzur. Ötən mövsüm “Liverpul” 20-ci dəfə İngiltərə çempionu olub. May ayında isə “Kristal Pelas” ilk dəfə ölkə kubokunu qazanaraq finalda “Mançester Siti”ni 1:0 hesabı ilə məğlub edib.
