BAKI, AzerVoice

MLS-in “İnter Mayami” klubunun futbolçuları – səkkizqat “Qızıl top” sahibi argentinalı Lionel Messi və “Barselona” ilə beş dəfə İspaniya çempionu olmuş uruqvaylı Luis Suares öz futbol klublarını qurublar.

AzerVoice xəbər verir ki, bu barədə Suares X sosial şəbəkəsində məlumat verib.

Yeni yaradılan komanda “Deportivo LSM” adlandırılıb və Uruqvay çempionatının güc baxımından dördüncü divizionunda çıxış edəcək. “LSM” adı futbolçuların adlarının baş hərflərini əks etdirir.

“Bu gün mən sevdiyim və böyüdüyüm Uruqvay futboluna yeniyetmələr və uşaqlar üçün inkişaf imkanları yaratmaq istəyirəm. Bu səbəbdən, yeni klubla birlikdə Uruqvay Futbol Federasiyasının təşkil etdiyi yarışlarda iştirak etməyə qərar verdik. Bu bizim üçün böyük bir addım və ailəmlə birlikdə inandığımız layihənin tərkib hissəsidir” - deyə, Luis Suares bildirib.

“Bu yuxu burada bitmir. Onu ailəmiz, dostlarımız və bizə yaxın insanlarla paylaşırıq. Uşaqlıqdan çox ortaq yanlarımız olub, futbolun zirvələrində birgə təcrübələr yaşamışıq. Məhz bu səbəbdən bu layihəni sizə təqdim etmək istədim. Bu layihə futbol haqqında baxışlarımızı paylaşmaq üçün ideal fürsətdir” - deyə, Lionel Messi vurğulayıb.

Hazırda Messi və Suaresin çıxış etdiyi “İnter Mayami” MLS-in Şərq Konfransında 14 oyundan sonra 23 xalla yeddinci yerdə qərarlaşıb. Komanda növbəti oyununu mayın 29-da evdə “Monreal”a qarşı keçirəcək.