BAKI, AzerVoice
İran, əgər ABŞ ölkənin dondurulmuş aktivlərini azad etsə və ölkənin uranı dinc məqsədlərlə zənginləşdirmək hüququnu tanısa uran zənginləşdirmə proqramını bir il müddətinə dayandırmağa hazırdır.
AzerVoice xəbər verir ki, bu barədə Reuters agentliyi İranlı mənbələrə istinadən məlumat yayıb.
Mənbələrin fikrincə, əgər ABŞ bu şərtləri qəbul edərsə, tərəflər siyasi razılaşmaya nail ola bilərlər. Qeyd olunur ki, bu məsələ hələlik ABŞ-ın danışıqlar heyəti ilə rəsmi şəkildə müzakirə edilməyib.
Təklif olunan razılaşmaya əsasən, İran bir il ərzində uranın zənginləşdirilməsini dayandıracaq. Eyni zamanda, artıq yüksək səviyyədə zənginləşdirilmiş uranın bir hissəsi başqa ölkələrə göndəriləcək və ya dinc məqsədlər üçün yanacağa çevriləcək.
ABŞ tərəfi dəfələrlə bəyan edib ki, İranın nüvə proqramı üzrə yeni razılaşma uran zənginləşdirməsinin tam dayandırılmasını əhatə etməlidir. Vaşinqton bu fəaliyyətin nüvə silahı istehsalına yönələcəyindən narahatdır.
Xatırladaq ki, ABŞ və İran nümayəndə heyətləri mayın 23-də Romada İranın nüvə proqramı ətrafında yaranmış böhranın nizamlanması üçün danışıqların beşinci raundunu aparıblar. Danışıqlarda Oman vasitəçi ölkə qismində çıxış edib. Oman xarici işlər naziri Bədr əl-Busaidi danışıqlardan sonra "müəyyən, lakin yekunlaşmamış irəliləyiş" əldə olunduğunu bəyan edib.
İranın nümayəndə heyətinin rəhbəri Seyid Abbas Araqçi isə bildirib ki, Tehran və Vaşinqton bir-iki görüşlə müsbət nəticənin əldə olunacağına ümid edir.
ABŞ Dövlət Departamentinin mətbuat xidmətinin rəhbəri Temmi Bryus isə çərşənbə axşamı keçirilən brifinqdə görüşün konstruktiv xarakter daşıdığını və tərəflərin yaxın zamanda yenidən görüşmək barədə razılığa gəldiklərini bildirib.
