Foto: Reuters
BAKI, AzerVoice
ABŞ Prezidenti Donald Trampın xüsusi nümayəndəsi Stiven Uitkoff bildirib ki, Vaşinqton yaxın saatlarda İsrail və HƏMAS-a Qəzza zolağında atəşkəs üçün şərtlərdən ibarət yeni siyahı göndərəcək.
AzerVoice xəbər verir ki, bu barədə o, Ağ Evdə jurnalistlərə açıqlama verib.
“Düşünürəm ki, biz yeni şərtlər siyahısının göndərilməsi ərəfəsindəyik. Ümid edirəm ki, bu sənəd yaxın saatlarda təqdim olunacaq. Prezident Donald Tramp onu nəzərdən keçirəcək” – deyə, Uitkoff bildirib.
“Uzunmüddətli nizamlanma, müvəqqəti atəşkəs və bu münaqişənin sülh yolu ilə həllinə dair çox yaxşı ümidlərim var”, - o əlavə edib.
Qeyd edək ki, daha əvvəl HƏMAS Uitkoffla Qəzza üzrə ümumi razılaşma çərçivəsində razılığa gəldiyini açıqlamışdı. Bu razılaşmaya əsasən, HƏMAS 10 israilli girovu azad etməyə və bir neçə həlak olmuş şəxsin cəsədini qarşı tərəfə təhvil verməyə hazırdır. Lakin təhvil veriləcək cəsədlərin dəqiq sayı açıqlanmayıb. Hazırda HƏMAS qarşı tərəfin bu təklifi ilə bağlı yekun cavabını gözləyir.