BAKI, AzerVoice
“Ştutqart” Almaniya Kubokunun finalında “Arminiya”nı 4:2 hesabı ilə məğlub edərək turnirin qalibi olub.
AzerVoice xəbər verir ki, oyun Berlin şəhərində keçirilib.
Qalib komandanın heyətində qolları Nik Voltemade (15-ci dəqiqə), Enzo Miyo (22 və 66-cı dəqiqələr) və Deniz Undav (28-ci dəqiqə) vurublar. “Arminiya”nın heyətində isə Yulian Kanya (82-ci dəqiqə) və Coşa Vaqnoman (85-ci dəqiqə) fərqləniblər.
“Ştutqart” tarixində dördüncü dəfə Almaniya Kubokunu qazanıb. Komanda bundan əvvəl bu turnirdə 1954, 1958 və 1997-ci illərdə qalib olmuşdu. Bu nəticə ilə “Ştutqart” titul sayında “Köln” və “Nyurnberq”lə bərabərləşib.
Turnirin rekordçusu “Bavariya” 20 dəfə kuboku qazanıb. Onu “Verder” (6 titul), “Şalke”, “Borussiya Dortmund” və Frankfurt “Ayntraxtı” (hərəsi 5 titul) izləyir.
“Arminiya” bu mövsüm Almaniyanın üçüncü liqasında çıxış edib və çempion olaraq növbəti mövsüm bir üst liqaya yüksəlmək hüququ qazanıb. Bilefeld klubu tarixində ilk dəfə Almaniya Kubokunun finalına yüksəlib. Komanda yarımfinalda keçənilki çempion “Bayer”i 2:1 hesabı ilə məğlub etmişdi.
