BAKI, AzerVoice
Həftə ərzində Konqo Demokratik Respublikasının (KDR) Senatı keçmiş prezident Jozef Kabilanın toxunulmazlığını ləğv etdikdən sonra onun işi Hərbi Prokurorluq tərəfindən araşdırılacaq.
AzerVoice xəbər verir ki, bu barədə Konqo mətbuatı məlumat yayıb.
Məlumatda qeyd edilib ki, Kabilanı hərbi tribunal gözləyə bilər.
Sabiq prezident olaraq Jozef Kabila ömürlük senator tituluna malikdir və bu status normalda onu hüquqi təqiblərdən qoruyur. Lakin Senatın səs çoxluğu ilə qəbul etdiyi qərarla onun toxunulmazlığı aradan qaldırılıb və bu, Hərbi Prokurorluğa onu məhkəmə məsuliyyətinə cəlb etməyə hüquqi əsas verir.
Hakimiyyət orqanları Kabilanı ölkənin şərqində fəaliyyət göstərən "Konqo Çayı Alyansı" (ARK) adlı üsyançı təşkilat, o cümlədən onun tərkibində olan “23 Mart Hərəkatı” (M23) ilə əlaqədə, həmçinin hərbi cinayətlər və insanlığa qarşı cinayətlərdə ittiham edir. Kabila bu ittihamları rədd edir və onları siyasi motivli sayır.
Ötən ilin avqust ayında hazırkı prezident Feliks Çisekedi Kabilanı qiyam hazırlığında ittiham etmişdi. Bu ilin mart ayında isə KDR-in baş nazir müavini, nəqliyyat naziri Jan-Pyer Bemba keçmiş prezidenti ARK və M23 qiyamçılarını dəstəkləməkdə günahlandırmış və bu barədə sübutlarının olduğunu açıqlamışdı.
