BAKI, AzerVoice

Ekvadorun yenidən seçilmiş prezidenti Daniel Noboa ölkənin dövlət başçısı kimi and içib.

AzerVoice xəbər verir ki, inaruqasiya mərasimi Ecuavisa telekanalı vasitəsilə canlı yayımlanıb.

“Mənim borcum – münaqişədən kənarda durmaq deyil, çünki bu problem heç vaxt belə həll olunmayıb; ölkəni illərlə özlərinə məxsus sayan cinayətkarlarla çətin və tükəndirici mübarizədən yayınmaq deyil. Mən belə biri deyiləm, bu nə Ekvadora uyğundur, nə də sizin məndən gözlədiyiniz budur” – deyə, Noboa çıxışında bildirib.

Onunla birlikdə yeni vitse-prezident Mariya Xose Pinto da and içib.

İnauqurasiya mərasimində Peru prezidenti Dina Boluarte və Kolumbiya prezidenti Qustavo Petro da iştirak ediblər. Qeyd edək ki, Petro seçki nəticələri elan edildikdən sonra ilk olaraq onlara şübhə ilə yanaşmışdı.

Qeyd edək ki, Ekvadorda prezident seçkilərinin ikinci turu aprelin 13-də keçirilib. Milli Seçki Şurası hazırkı prezident Daniel Noboanı qalib elan edib. Protokolların 99,47 faizinin işlənməsindən sonra açıqlanan nəticələrə əsasən, Noboa 55,60 faiz, rəqibi Luisa Qonsales isə 44,40 faiz səs toplayıb. Qonsales nəticələri mübahisələndirməyə çalışsa da, Mərkəzi Seçki Komissiyası bütün şikayətləri rədd edib.

Məlumat üçün bildirək ki, Noboa, Ekvadorun ən varlı sahibkarlarından birinin oğludur. O, ilk dəfə 2023-cü ilin oktyabrında keçirilən növbədənkənar prezident seçkilərində qalib gəlmişdi. Onun hakimiyyətə gəlişi ölkədə təhlükəsizlik böhranının kəskinləşməsi dövrünə təsadüf edib. Ötən ilin yanvarında prezident ölkədə daxili silahlı münaqişənin mövcudluğunu tanıyan fərman imzalayıb və 22 cinayətkar qruplaşmanın zərərsizləşdirilməsi barədə göstəriş verib. Seçki kampaniyası zamanı Noboa təhlükəsizlik siyasətini davam etdirəcəyini, o cümlədən təhlükəli cinayətkarlar üçün meqa-həbsxanalar inşa etdirəcəyini vəd etmişdi.