BAKI, AzerVoice

Barcelona, yeni mövsümdə klubun simvolik 10 nömrəli formasını Lamin Yamala verməyə hazırlaşır.

AzerVoice xəbər verir ki, La Masia akademiyasının məzunu olan 17 yaşlı hücumçu, yaxın zamanda klubla yeni müqavilə imzalayacaq və bu müqaviləyə 1 milyard avro dəyərində sərbəstqalma maddəsi daxil ediləcək.

Yamal bu mövsüm parlaq çıxışı ilə diqqət çəkib. O, Kataloniya təmsilçisinin daxili turnirlərdə “trebl” qazanmasında əsas fiqurlardan biri olub. Əvvəlcə Xavi Hernandezin rəhbərliyi altında 15 yaşında əsas komandaya yüksələn gənc futbolçu, daha sonra Hansi Flikin rəhbərliyi ilə dünyanın ən yaxşı oyunçularından birinə çevrilib. Futbol ictimaiyyəti onu 2025-ci ilin Qızl Top mükafatına əsas namizədlərdən biri kimi görür.

Məlumata görə, hazırda 10 nömrəli formanı daşıyan Ansu Fatinin zədələri və geriləyən performansı səbəbindən Barcelona rəhbərliyi bu nömrəni Yamalın daşımasına qərar verib.

Yamal hazırda Barcelona-da 19 nömrəli formanı geyinir. Qeyd edək ki, Lionel Messi də 10 nömrəni almamışdan əvvəl məhz bu nömrə ilə çıxış edirdi.

Klub prezidenti Joan Laportanın rəhbərliyi ilə hazırlanan yeni müqavilə planına əsasən, Yamal 18 yaşını tamamladıqdan sonra uzunmüddətli müqaviləyə imza atacaq.