BAKI, AzerVoice

UEFA Avropa Liqasının finalında İngiltərənin iki tanınmış klubu Tottenham Hotspur və Mançester Yunayted bu gün tarix yazmaq üçün meydana çıxacaq.

AzerVoice xəbər verir ki, oyun İspaniyanın Bilbao şəhərindəki San Mames stadionunda Bakı vaxtı ilə saat 23:00-da start götürəcək.

Tottenham bu turnirdə 1972 və 1984-cü illərdə çempion olub. İlk titulu 1971-1972 mövsümündə UEFA Kubokunun rəsmi başlanğıcında, digərini isə Anderlexti penaltilərlə məğlub etməklə qazanıb. 1974-cü ildə isə Feyenoord qarşısında finalda məğlub olub.

Mançester Yunayted isə 2017-ci ildə Niderland təmsilçisi Ayaks üzərində 2:0 hesablı qələbə ilə ilk dəfə Avropa Liqası kubokunu qazanıb. Lakin 2021-ci ildə Villarreal ilə oynadığı finalda penaltilər seriyasında uduzaraq ikinci yeri tutub.

Bu iki klub Avropa səhnəsində yalnız bir dəfə üz-üzə gəlib. 1963-64 mövsümündə Kubok Sahibləri Kubokunun 1/8 final mərhələsində ilk oyunu Tottenham 2:0 qazansa da, cavab oyununda 4:1 hesabı ilə qalib gələn Mançseter Yunayted növbəti mərhələyə yüksəlib.

Qeyd edək ki, turnirin tarixi rekordçusu Sevilla sayılır. İspan klubu bu kuboku 7 dəfə qazanaraq ən yaxın izləyicilərini geridə qoyub. Yuventus, İnter, Liverpul və Atletiko Madrid hər biri 3 dəfə çempion olublar.