BAKI, AzerVoice
İngiltərə millisinin və Mançester Yunayted klubunun sabiq müdafiəçisi Ryo Ferdinand hazırda dünyanın ən yaxşı futbolçusunun adını açıqlayıb.
AzerVoice xəbər verir ki, tanınmış futbol ekspertinin fikrincə, bu ada İspaniya millisinin və Barselonanın 17 yaşlı ulduzu Lamin Yamal layiqdir.
Televiziya şərhçisi kimi çıxış edən Ferdinand, gənc futbolçu haqqında heyranlıqla danışıb.
“Hazırda dünyanın ən yaxşı oyunçusu Lamin Yamaldır. Mən bu uşağa valehəm. O, sanki futbola fərqli yanaşır. Elə bil 28 yaşlı peşəkar kimi düşünür, amma cəmi 17 yaşı var. Bu, dəli bir şeydir. Ən vacib anlarda təzyiq hiss etmədən qərarlar verir”- deyə o bildirib.
Lamin Yamal artıq bu yaşda dünya futbolunun ən parlaq istedadlarından biri kimi tanınır. O, 15 yaş 290 gün yaşında La Liqada Barselona ilə debüt edərək klub tarixinin ən gənc oyunçusu olub. 2023/24 mövsümündə 50 oyunda 7 qol və 9 assistlə çıxış edən Yamal, növbəti mövsümdə Barselonanın çempionluğuna həlledici töhfə verib və Espanyolla derbidə qələbə qolunu vurub.
