BAKI, AzerVoice
Səudiyyə Ərəbistanı İsrailin Dəməşqdəki prezident sarayının ətrafını hədəf alan hava hücumunu sərt şəkildə qınayıb.
AzerVoice xəbər verir ki, bu haqda Səudiyyə Ərəbistanı Xarici İşlər Nazirliyinin yaydığı bəyanatda bildirilib.
Bəyanatda qeyd olunub ki, İsrailin Suriyada və regionda beynəlxalq hüquqa açıq-aşkar zidd olan bu cür pozuntularına dərhal son qoyulmalıdır. Krallıq İsrailin radikal siyasətinin davam etməsinin zorakılıq, ekstremizm və regional sabitliyin pozulması risklərini artırdığı barədə xəbərdarlıq edib.
Suriyanın Prezident Administrasiyası da verdiyi bəyanatda, prezident sarayına edilən hücumu dövlətin qurumlarına və suverenliyinə qarşı ciddi təxribat adlandıraraq sərt şəkildə pisləyib. Bəyanatda bildirilib ki, bu hücum ölkədə sabitliyi pozmaq və təhlükəsizlik böhranını dərinləşdirmək məqsədi ilə edilib.
Suriya höküməti beynəlxalq ictimaiyyəti və ərəb ölkələrini bu hücumlar qarşısında Suriya ilə həmrəy olmağa çağırıb.
Xatırladaq ki, İsrail ordusu Dəməşqdə Prezident Sarayının yaxınlığında yerləşən bir hədəfə zərbə endirdiyini açıqlayıb.
İsrail tərəfindən verilən açıqlamada hücumun, Dürzi icmasına qarşı təhlükələri önləmək məqsədilə həyata keçirildiyi bildirilib.
