BAKI, AzerVoice

Səudiyyə Ərəbistanı və Qətərin Suriyanın Dünya Bankı Qrupuna olan təxminən 15 milyon dollarlıq borcunu ödəyib.

AzerVoice xəbər verir ki, bu barədə Səudiyyə Ərəbistanı və Qətərin maliyyə nazirliklərinin verdiyi birgə bəyanatda bildirilib.

Bəyanatda qeyd olunub ki, iki ölkə Suriya iqtisadiyyatının bərpasını dəstəkləmək səyləri çərçivəsində Suriyanın Dünya Bankı Qrupuna olan ödənilməmiş borclarını öz üzərinə götürüb.

Bəyanatda bildirilib ki, bu addımın məqsədi Suriyanın beynəlxalq maliyyə sisteminə yenidən inteqrasiyasına töhfə verməkdir .

Bu addım, Dünya Bankı Qrupunun Suriyaya dəstəyini və fəaliyyətlərini 14 ildən sonra yenidən bərpa etməsinə kömək edəcək.

Eyni zamanda, Suriya Dünya Bankından təcili sektorlar üçün maliyyə və texniki dəstək ala biləcək.

Bu resurslar institusional yenidənqurma, potensialın artırılması, siyasət islahatları və inkişaf səylərinin sürətləndirilməsinə töhfə verəcək.

Səudiyyə Ərəbistanı və Qətər beynəlxalq və regional maliyyə qurumlarına çağırış edərək Suriyada inkişaf fəaliyyətlərini təcili olaraq yenidən başlatmağa, səylərini artırmağa və Suriya xalqının gələcək gözləntilərini qarşılayacaq bütün təşəbbüsləri dəstəkləməyə çağırıblar.

Bəyanatda, atılan bu addımların bölgənin sabitliyinə və rifahına töhfə verəcəyi vurğulanıb.