BAKI, AzerVoice, Nailə Babazadə

Qrenlandiyanın Baş Naziri Yens Frederik Nielsen ABŞ Prezidenti Donald Trampın avtonom Danimarka ərazisini ilhaq etmək təhdidlərinə sərt reaksiya verib.

AzerVoice xəbər verir ki, o, bu barədə Facebook səhifəsində paylaşım edib.

“Daha çox təzyiq olmayacaq. Daha çox işarələr olmayacaq. İlhaq xəyalları olmayacaq. Biz dialoqa və müzakirələrə açığıq, amma bu yalnız beynəlxalq hüquqa hörmətlə və düzgün kanallar vasitəsilə baş verməlidir.” - deyə paylaşımda qeyd edib.

Prezident Tramp bazar günü ABŞ-ın tərkibinə Qrenlandiyanın qatılması iddiasını təkrarlayıb. O, strateji yerləşməsinə görə Qrenlandiyanı milli təhlükəsizlik baxımından önəmli adlandırıb. Tramp jurnalistlərin suallarına cavab olaraq bildirib:

“Qrenlandiya barədə iki ay sonra fikirləşəcəyik… 20 gün sonra isə bu barədə danışaq.”

Danimarkanın Baş Naziri Mette Frederiksen isə ABŞ-ı “tarixi müttəfiqi təhdid etməməyi” çağırıb. O bildirib ki, ABŞ-ın Qrenlandiyanın idarəsini ələ keçirməsi “tamamilə absurddur”. Frederiksen həmçinin vurğulayıb ki, Danimarka və Qrenlandiya NATO üzvüdür və bu, onları təhlükəsizlik zəmanətləri ilə qoruyur.

Trampın Qrenlandiya ilə bağlı iddiaları ABŞ-ın Venesueladakı hərbi müdaxiləsindən sonra yenidən gündəmə gəlib və Qrenlandiyanın strateji əhəmiyyətini bir daha önə çıxarıb.