BAKI, AzerVoice

Dünyadakı buzlaqların 40%-i yox olacaq.

AzerVoice xəbər verir ki, “Science” jurnalında dərc olunan yeni tədqiqata görə, qlobal istiləşmə bu gün tamamilə dayandırılsa belə, dünyadakı buzlaqların təxminən 40%-i artıq yox olacaq.

Tədqiqatçılar bildiriblər ki, buzlaqlar 2020-ci ilə nisbətən kütlələrinin 39%-ni itirəcək və bu, dəniz səviyyəsinin təxminən 11 santimetr qalxmasına səbəb olacaq. Əgər mövcud iqlim siyasəti davam edərsə, itki 76%-ə qədər arta bilər. Bu isə içməli su, kənd təsərrüfatı və enerji təminatında buzlaqlardan asılı olan bölgələr üçün ciddi nəticələr doğura bilər.

Araşdırmanın həmmüəlliflərindən biri, buzlaq tədqiqatçısı Ceyms Kirkham, “39% və 76% arasında fərq bəşəriyyətin bu itkilərə uyğunlaşıb-uyğunlaşa bilməyəcəyi ilə ölçülür”.- deyə qeyd edib.

Tədqiqatın rəhbəri, Avstriyanın İnsbruk Universitetindən Lilian Şuster isə “Hər 0,1 dərəcə Selsi istiləşmə buzlaqların əlavə 2% itirilməsi deməkdir. Bu səbəbdən biz ümid verməyə çalışırıq – qlobal temperaturun hər onda biri belə buzlaqların qorunmasına kömək edə bilər” - deyə o bildirib.

Bu araşdırma əvvəlkilərdən fərqli olaraq, yalnız 2100-cü ilə qədər deyil, daha uzunmüddətli dövrdə buzlaqların necə təsirlənəcəyini simulyasiya edib. Müxtəlif model nəticələri 15%-dən 55%-ə qədər dəyişsə də, hamısı ərimənin davamlı olacağını göstərib.

Tədqiqatda ən çox risk altında olan bölgələr Qərbi Kanada, ABŞ, Şimal-Şərqi Kanada, Skandinaviya və Rusiya Arktikası kimi ərazilər göstərilib.