BAKI, AzerVoice, Fərid Mikayılov

Dünya Meteorologiya Təşkilatı (WMO) yeni hesabatında qlobal su dövrünün sürətlə qeyri-sabitləşdiyini açıqlayıb. Qurum, iqlim dəyişikliyi səbəbilə buzlaqların əriməsi, uzunmüddətli quraqlıqlar və dağıdıcı daşqınların artmasının planetin ən həyati sistemini “nəzarətdən çıxardığını” vurğulayıb.

Hesabata əsasən, 2024-cü ildə buzlaq bölgələri ardıcıl üçüncü dəfə kütlə itkisi yaşayıb. Yalnız bir ildə 450 giqaton buzun əriməsi, dəniz səviyyəsinin 1,2 millimetr yüksəlməsinə səbəb olub. Bu proses sahilyanı bölgələrdə yaşayan yüz milyonlarla insan üçün daşqın riskini artırır.

Dünya çay hövzələrinin üçdə ikisi normadan kənar vəziyyətlə üzləşib.

Amazon və Afrikanın bəzi bölgələrində quraqlıq hökm sürərkən, Asiya və Avropada həddindən artıq yağıntılar qeydə alınıb.

Çayların təxminən 60 faizi ya həddindən artıq, ya da kifayət qədər az su daşıyıb.

Afrikada baş verən daşqınlar 2 min 500 insanın ölümünə, 4 milyon nəfərin isə məcburi köçkün olmasına gətirib çıxarıb.

Braziliyada daşqınlar 183 nəfərin həyatına son qoyub, Amazon hövzəsindəki quraqlıq isə ölkənin 59 faizinə təsir edib.

WMO Baş katibi Celeste Saulo su ehtiyatlarının izlənməsinin və elmi əsaslı məlumatların paylaşılmasının həyati əhəmiyyət daşıdığını bildirib.