BAKI, AzerVoice, Orxan Qədirzadə

Qəzzanın cənubunda İsrail hərbçilərinin açdığı atəş nəticəsində bir fələstinli gənc ölüb, daha bir nəfər yaralanıb.

AzerVoice xəbər verir ki, yerli tibbi mənbələrin məlumatına görə, fələstinli gənc Xan-Yunusun qərbində, əl-Mavasi ərazisinin cənubunda baş nahiyəsindən aldığı güllə yarasından həyatını itirib. Digər bir gənc isə Xan-Yunusun şərqində açılan atəş nəticəsində orta ağır vəziyyətdə yaralanıb.

Məlumata görə, oktyabr ayında qüvvəyə minmiş atəşkəs rejiminə baxmayaraq, İsrail tərəfi onu yüzlərlə dəfə pozub. Artilleriya atəşləri və snayper güllələri nəticəsində yüzlərlə mülki şəxs həlak olub və ya yaralanıb.

Atəşkəs pozuntuları yanvar ayında ABŞ tərəfindən razılaşmanın ikinci mərhələsinin başladığı elan edildikdən sonra da davam edib. Sözügedən mərhələ İsrail qüvvələrinin Qəzzadan növbəti mərhələli çıxarılmasını və Birləşmiş Millətlər Təşkilatının təxminən 70 milyard dollar dəyərində qiymətləndirdiyi bərpa proqramının başlanmasını nəzərdə tutur.

Qeyd olunur ki, atəşkəs İsrailin Qəzzaya qarşı 8 oktyabr 2023-cü ildə başladığı və təxminən iki il davam edən müharibəni dayandırmalı idi. Bu müddət ərzində 71 mindən çox fələstinli həyatını itirib, 171 mindən artıq insan yaralanıb, Qəzza sektorunun infrastrukturunun təxminən 90 faizi dağıdılıb.