BAKI, AzerVoice

Yeni tədqiqat, 2010–2019-cu illər arasında 15-49 yaş arası insanlarda bəzi xərçəng növlərinin artdığını üzə çıxarıb. Ümumilikdə 2 milyondan çox erkən yaşda xərçəng diaqnozu qoyulmuş hadisə analiz olunub.

Tədqiqat nəticələrinə görə, süd vəzisi (məmə), yoğun bağırsaq (kolorektal), böyrək və uşaqlıq (uterus) xərçəngi bu dövrdə əhəmiyyətli artım göstərib. 2019-cu ildə yalnız məmə xərçəngi üzrə 4800 əlavə hal, kolorektal xərçəng üzrə 2000-dən çox əlavə hal, böyrəkdə 1800, uterusda isə 1200 əlavə hal qeydə alınıb.

Mütəxəssislər bildirir ki, erkən diaqnostika imkanlarının artması və skrininq proqramlarının genişlənməsi də statistik artıma təsir göstərmiş ola bilər. Xərçəng hallarının 63 faizi qadınlarda aşkarlanıb.

Araşdırmanın müəlliflərindən biri, ABŞ Milli Xərçəng İnstitutunun əməkdaşı Meredit Şiels bildirib ki, artımın səbəbləri arasında piylənmə və həyat tərzi ilə bağlı dəyişikliklər əsas ehtimallardandır. Eyni zamanda qadınların ilk doğuş yaşının gecikməsi də süd vəzi xərçənginin artmasına təsir edən amil kimi göstərilib.

Müsbət tendensiya ondan ibarətdir ki, erkən yaşda xərçəngə yoluxma artsa da, ölüm göstəricilərində ciddi dəyişiklik qeydə alınmayıb. İstisnalar arasında kolorektal, testis və uterus xərçəngi var.

Digər tərəfdən, bəzi xərçəng növlərində isə azalma müşahidə olunur. Ağciyər və prostat xərçəngləri bu qəbildəndir. Bu isə əsasən siqaret çəkənlərin sayının azalması və PSA testlərinin gənc yaşda daha az istifadə olunması ilə izah edilir.