BAKI,AzerVoice, Fərid Mikayılov

İsrail hakimiyyəti Qətərə məxsus Əl Cəzirə və Livana məxsus Əl-Məyadin televiziya kanallarının ölkə ərazisində yayımına məhdudiyyət tətbiq edib.

AzerVoice xəbər verir ki, İsrailin rabitə naziri Şlomo Karhi X sosial şəbəkəsində yaydığı açıqlamada bildirib ki, qərara əsasən hər iki telekanalın internet saytları, televiziya yayımları və “YouTube” platformasındakı fəaliyyəti İsrail ərazisində bloklanacaq.

Karhi qeyd edib ki, peyk yayımının dayandırılması məsələsi isə İsrailin müdafiə nazirinin səlahiyyətləri çərçivəsindədir.

Bu arada “Haaretz” qəzetinin məlumatına görə, qərar ilkin mərhələdə 90 gün müddətində qüvvədə olacaq və bu müddətin sonunda onun uzadılması ilə bağlı ayrıca qərar qəbul edilməlidir.

Qəzet yazır ki, sözügedən addım İsraildə “Əl Cəzirə Qanunu” kimi tanınan və iki ildən artıq əvvəl xarici media qurumlarının fəaliyyətinə məhdudiyyətlər nəzərdə tutan qanunun tətbiq dairəsini daha da genişləndirir.

Məlumatda həmçinin xatırladılır ki, ötən ay İsrail parlamenti rabitə nazirinə fövqəladə vəziyyət elan edilməsindən asılı olmayaraq xarici media qurumlarının fəaliyyətini dayandırmaq səlahiyyəti verən qanun dəyişikliyini təsdiqləyib. Bu dəyişiklik hazırkı qərarın hüquqi əsasını formalaşdıran əsas mexanizmlərdən biri kimi qiymətləndirilir.