BAKI,AzerVoice, Fərid Mikayılov

Süni intellekt (AI) texnologiyalarının həyatımıza sürətlə inteqrasiyası insanların real insan səsləri ilə süni intellekt tərəfindən yaradılan səs klonlarını fərqləndirməsini çətinləşdirib. Bu nəticə PLoS One jurnalında dərc olunan yeni elmi araşdırmanın əsas qənaətlərindən biridir.

Təcrübədə iştirak edən könüllülərə 80 fərqli səs nümunəsi dinlədilib, onların yarısı süni intellekt tərəfindən yaradılmış, yarısı isə real insanlara məxsus səslər olub. İştirakçılar səsləri etibarlılıq və təsir gücünə görə qiymətləndiriblər.

Araşdırma nəticəsində məlum olub ki, iştirakçıların çoxu AI tərəfindən sıfırdan yaradılmış süni səsləri tanıya bilsə də, insan səslərindən klonlanmış süni səsləri çox zaman real hesab edib. Belə ki, süni klonların 58 faizi “real” kimi qəbul edilib, real səslərin isə yalnız 62 faizi düzgün müəyyən olunub.

Səs klonlama texnologiyası bir şəxsin səsini analiz edərək onun ton, vurğu və tələffüz xüsusiyyətlərini kopyalayır. Bu bacarıq, yaradıcı sahələrlə yanaşı, dələduzluq və saxtakarlıq halları üçün də yeni imkanlar yaradır.

Mütəxəssislərin fikrincə, bu texnologiyanın sürətlə yayılması etibarlı təhlükəsizlik mexanizmlərinə və etik nəzarətə ehtiyac yaradır.

Süni intellektlə yaradılan səslərin potensialı yalnız risklərlə məhdudlaşmır. Bu texnologiya nitq qabiliyyətini itirmiş şəxslərin kommunikasiya imkanlarını genişləndirir. Dr. Lavan bildirir ki, artıq insanlar öz səslərini yenidən yarada və ya tamamilə fərdi səs kimliyi formalaşdıra bilirlər.

Eyni zamanda süni səslər təhsil, media və audio kitab istehsalı sahəsində əlçatanlığı artırır. Son araşdırmalara görə, süni intellekt əsaslı səsli tədris sistemləri diqqət çatışmazlığı və hiperaktivlik sindromu (DEHB) olan şagirdlərin motivasiyasını artırır.