BAKI, AzerVoice, Orxan Qədirzadə

Türkiyənin xarici işlər naziri Hakan Fidan Avropa İttifaqının Ankaraya münasibətində köklü dəyişiklik olmadığı təqdirdə üzvlük perspektivinin real görünmədiyini bildirib.

AzerVoice xəbər verir ki, nazir bu fikirləri “Sky News Arabia” telekanalına müsahibəsində səsləndirib.

Hakan Fidan Avropa İttifaqının Türkiyəyə münasibətdə “kimlik siyasəti”nə əsaslanan yanaşmanı davam etdirdiyini vurğulayıb. Onun sözlərinə görə, Aİ institusional baxımdan milli sərhədləri aşan quruma çevrilsə də, mədəni və sivilizasiya baxımından inklüziv model formalaşdıra bilməyib. Fidan qeyd edib ki, Türkiyə məsələsində fərqli din və sivilizasiyaya mənsubluq arqumenti ön plana çəkilir və bu da üzvlük prosesinin əsas maneəsinə çevrilir.

Nazir Suriyada Bəşşar Əsədin ölkəni tərk etməsindən sonra yaranmış yeni vəziyyətə də toxunub. Bildirib ki, Türkiyə və region ölkələri Şamda formalaşan yeni idarəçiliklə bağlı adlardan asılı olmayan, prinsiplərə əsaslanan mövqe sərgiləyir. Fidan Suriya üzrə dörd əsas prioritet ətrafında regional uzlaşmanın əldə olunduğunu açıqlayıb.

Onun sözlərinə görə, bu prioritetlər Suriyanın qonşular üçün təhlükə yaratmaması, terror təşkilatları ilə əməkdaşlıq etməməsi, azlıqlara və dini qruplara qarşı zorakılığa yol verilməməsi və ölkənin ərazi bütövlüyünün qorunmasıdır. Nazir qeyd edib ki, bu tələblər Suriya prezidenti Əhməd əş-Şəraaya çatdırılıb və Dəməşq rəhbərliyi tərəfindən məqbul hesab edilib.

Hakan Fidan Türkiyə üçün miqrasiya və terrorla mübarizənin əsas iki strateji məsələ olduğunu vurğulayıb. O əlavə edib ki, bu yanaşma yalnız Ankaranın deyil, həm də region ölkələri və beynəlxalq tərəfdaşların ümumi gözləntisidir. Nazir Avropa və ABŞ tərəflərinin də prosesə cəlb olunduğunu və məqsədin Suriyada formalaşacaq istənilən hökumətdən gözləntilərin aydın şəkildə müəyyənləşdirilməsi olduğunu bildirib.