BAKI, AzerVoice, Fərid Mikayılov

Yaponiyanın şimal-şərqində baş verən 7,5 bal gücündə zəlzələ nəticəsində azı 30 nəfər xəsarət alıb, on minlərlə sakin evakuasiya edilib.

AzerVoice xəbər verir ki, Yaponiyanın Meteorologiya Agentliyinin məlumatına əsasən, yeraltı təkanlar, Aomori sahillərindən təxminən 80 km məsafədə, 50 km dərinlikdə qeydə alınıb. Zəlzələ sonrası verilmiş sunami xəbərdarlıqları artıq ləğv olunub, lakin sahilə 70 sm hündürlüyündə dalğalar çırpılıb.

Hadisə nəticəsində minlərlə ev işıqsız qalıb, regionun bəzi hissələrində dəmir yolu xətləri üzrə hərəkət dayandırılıb. Hakimiyyət orqanları yaxın günlərdə daha güclü təkanların olma ehtimalını istisna etməyərək əhalini yüksək hazırlıq vəziyyətində qalmağa çağırıb.

“Ehtiyat tədbirlərinizi yenidən nəzərdən keçirin və yeni sarsıntı hiss etdikdə dərhal təxliyəyə hazır olun”- deyə Yaponiyanın Baş naziri Sanai Takaici zəlzələdən zərər çəkənlərə müraciətində bildirib.

Reuters agentliyinin məlumatına görə, təxminən 90 min nəfərin təxliyəsi barədə göstəriş verilib.

Aomori prefekturasının yerli hakimiyyəti 2 min 700-dən çox evin elektrik enerjisiz qaldığını açıqlayıb. East Japan Railway şirkəti isə bölgənin şimal-şərq hissəsində bəzi qatar marşrutlarını dayandırıb.

Qeyd edək ki, Yaponiya ildə təxminən 1 500 zəlzələ yaşayan, seysmik cəhətdən dünyanın ən aktiv bölgələrindən birində yerləşir. Mütəxəssislər yaxın 30 ildə Nankai çökəkliyində dağıdıcı meqa zəlzələnin baş vermə ehtimalını 60-90% faiz arasında qiymətləndirirlər.