BAKI, AzerVoice, Orxan Qədirzadə

Rusiya Ukrayna və ABŞ-la Abu-Dabidə keçirilən danışıqlarda nəzarətində olmayan ərazilər də daxil olmaqla Donbasın tamamilə ona verilməsində israr edir.

AzerVoice xəbər verir ki, Reuters agentliyinin Kremlə yaxın mənbəyə istinadən yaydığı məlumata görə, Moskva danışıqlarda “Ankoric formulu” adlandırılan sxemi irəli sürür. Rusiya tərəfi iddia edir ki, bu yanaşma ötən ilin avqustunda ABŞ Prezidenti Donald Tramp ilə Rusiya Prezidenti Vladimir Putin arasında keçirilmiş sammitdə razılaşdırılıb.

Agentliyin məlumatına əsasən, Moskvanın təklif etdiyi plan Donbasın bütün ərazisinin Rusiyaya verilməsini, Ukraynanın şərq və cənub bölgələrində isə mövcud cəbhə xətlərinin dondurulmasını nəzərdə tutur. Kiyev isə daha əvvəl dəfələrlə bəyan edib ki, bu cür şərtlər Ukrayna üçün qəbuledilməzdir.

Ukrayna Prezidenti Volodimir Zelenski bildirib ki, Abu-Dabidə keçiriləcək üçtərəfli görüş ərəfəsində Ukrayna nümayəndə heyəti ilə məsləhətləşmələr aparılıb. Onun sözlərinə görə, komanda danışıqların çərçivəsini və gözlənilən nəticəni anlayır.

Zelenski qeyd edib ki, dialoqun formatı görüş zamanı dəyişə bilər və qərarlar yerində qəbul olunacaq, çünki bu format uzun müddətdən sonra ilk dəfə tətbiq olunur. O, daha əvvəl bəyan etmişdi ki, Ukrayna, ABŞ və Rusiya arasında danışıqların əsas mövzusu ərazi məsələsi olacaq və müzakirələrin mərkəzində Donbasın taleyi dayanacaq.

Kreml də təsdiqləyib ki, danışıqlarda əsas məsələ ərazilərlə bağlıdır. Rusiya Prezidentinin mətbuat katibi Dmitri Peskov bildirib ki, Moskvanın mövqeyi Ukrayna Silahlı Qüvvələrinin “Donbas ərazisini tərk etməsi” tələbindən ibarətdir.

Vladimir Putinin köməkçisi Yuri Uşakov isə daha əvvəl qeyd edib ki, ərazi məsələsi üzrə diplomatik həll əldə olunmasa, Rusiya “qarşıya qoyulan məqsədlərə” hərbi yolla nail olmağa hazırdır.