BAKI, AzerVoice, Nailə Babazadə

Fransa, Böyük Britaniya, Kanada və Yaponiya da daxil olmaqla 14 ölkə çərşənbə günü İsrailin işğal altındakı İordan çayının qərb sahilində yeni yəhudi yaşayış məntəqələrinin yaradılması ilə bağlı son qərarını kəskin şəkildə pisləyib və İsrail hökumətini bu qərardan geri çəkilməyə, həmçinin məskunlaşma fəaliyyətlərini dayandırmağa çağırıb.

AzerVoice xəbər verir ki, Fransa Xarici İşlər Nazirliyinin yaydığı birgə bəyanatda bildirilir:

“Almaniya, Belçika, Kanada, Danimarka, İspaniya, Fransa, İtaliya, İrlandiya, İslandiya, Yaponiya, Malta, Niderland, Norveç və Böyük Britaniyanın nümayəndələri, İsrail hökumətinin təhlükəsizlik kabinetinin işğal altındakı İordan çayının qərb sahilində 19 yeni yaşayış məntəqəsinin yaradılması barədə qərarını pisləyirik.”

Bəyanatda vurğulanır ki, tərəflər istənilən ilhaq cəhdinə və məskunlaşma siyasətinin genişləndirilməsinə qəti şəkildə qarşıdırlar. Sənəddə İsrailə çağırış edilərək qeyd olunur ki, hökumət bu qərardan imtina etməli və yaşayış məntəqələrinin genişləndirilməsi planlarını ləğv etməlidir.

Birgə bəyanatda əlavə olunur: “Xatırladırıq ki, məskunlaşma siyasətinin daha geniş miqyasda intensivləşdirilməsi çərçivəsində atılan bu kimi birtərəfli addımlar təkcə beynəlxalq hüququ pozmur, eyni zamanda bölgədə sabitliyin daha da zəifləməsinə səbəb olur.”