BAKI,AzerVoice, Fərid Mikayılov

Yaponiyanın qərbində yerləşən Şimane və Tottori prefekturalarında 6,2 bal gücündə zəlzələ baş verib.

AzerVoice xəbər verir ki, Yaponiya Meteorologiya Agentliyinin (JMA) məlumatına əsasən, zəlzələnin episentri Şimane prefekturasının şərqində yerləşib və ocağı 10 kilometr dərinlikdə olub.

Yeraltı təkanlar Yaponiyanın qərb bölgələrində geniş ərazidə hiss edilib, televiziya yayımları və mobil cihazlar üzərindən erkən xəbərdarlıq siqnalları aktivləşdirilib.

Rəsmi qurumlar hələlik ölənlər və ya ciddi dağıntılar barədə məlumat açıqlamasa da, ictimai yayımçı NHK zəlzələdən sonra dörd nəfərin xəstəxanaya yerləşdirildiyini, bəzi yaşayış və ictimai binalarda isə qismən zədələnmələrin qeydə alındığını bildirib.

JMA zəlzələdən sonra sunami təhlükəsinin olmadığını açıqlayıb. Bununla yanaşı, Tottori prefekturasının qərbində uzunmüddətli yer hərəkətləri üçün ən yüksək göstəricilərdən biri olan “Səviyyə 4” xəbərdarlığının müşahidə edildiyi bildirilib. Bu, 2024-cü ilin yanvarında Noto yarımadasında baş verən güclü zəlzələdən sonra ölkə üzrə qeydə alınan ilk bu səviyyəli siqnal kimi qiymətləndirilir.

Agentlik əhaliyə müraciət edərək, növbəti bir həftə ərzində 5 bal və daha yüksək gücə malik yeni zəlzələlərin baş verə biləcəyi barədə xəbərdarlıq edib və təhlükəsizlik qaydalarına ciddi əməl olunmasını tövsiyə edib.

Qeyd edək ki, Yaponiya seysmik baxımdan ən fəal zonalardan birində yerləşir. 2024-cü il yanvarın 1-də Noto yarımadasında baş verən 7,6 bal gücündə zəlzələ nəticəsində 698 nəfər həyatını itirmiş, minlərlə bina dağıdılmışdı.