BAKI,AzerVoice, Nailə Babazadə

Türkiyənin Milli Müdafiə naziri Yaşar Gülər Yaponiyanın Türkiyə istehsalı pilotsuz uçuş aparatlarını (PUA) tədarük etmə ehtimalına münasibət bildirib. O qeyd edib ki, bu sistemlər uzun müddət havada qalma, fasiləsiz müşahidə aparma və xərclərin səmərəli istifadəsi baxımından mühüm üstünlüklərə malikdir.

AzerVoice xəbər verir ki, nazirin sözlərinə görə, Türkiyə istehsalı PUA-lar Yaponiyanın müdafiə qabiliyyətləri üçün “çəkindirici amil” ola bilər. Gülər Yaponiya üçün mümkün modellər arasında Türkiyə Aerokosmik Sənayesi (TUSAŞ) tərəfindən istehsal olunan ANKA, eləcə də Bayraktar TB2 və Bayraktar TB3 pilotsuz uçuş aparatlarını nümunə göstərib.

Yaşar Gülər bildirib ki, Yaponiya Müdafiə naziri Nakatani Genin Ankaraya səfərindən sonra iki ölkə arasında dəniz təhlükəsizliyi, pilotsuz sistemlər, təlim və hava hücumundan müdafiə texnologiyaları sahələrində əməkdaşlıq müzakirələri davam edir.

O əlavə edib ki, bu ilin mart ayında Türkiyə Milli Müdafiə Nazirliyindən bir nümayəndə heyətinin Yaponiyaya səfəri və müdafiə sənayesi üzrə çərçivə sazişi məsələlərinin müzakirəsi planlaşdırılır. Nazirin fikrincə, Yaponiyanın qabaqcıl texnologiya potensialı ilə Türkiyənin istehsal və əməliyyat təcrübəsinin birləşməsi strateji əməkdaşlıq üçün geniş imkanlar yaradır.