BAKI, AzerVoice, Nailə Babazadə
İranın xarici işlər naziri Abbas Əraqçi yapon həmkarı Toşimitsu Motegi ilə ikitərəfli münasibətlər və regional məsələlərlə bağlı telefon danışığı aparıb.
AzerVoice xəbər verir ki, Əraqçi söhbət zamanı Motegini yenidən Yaponiya xarici işlər naziri vəzifəsinə təyin olunması münasibətilə təbrik edib.
Tərəflər siyasi, iqtisadi və ticarət sahələrində mövcud əməkdaşlıq vəziyyətini və əlaqələrin genişləndirilməsi imkanlarını müzakirə ediblər.
Görüş zamanı Əraqçi həmçinin İranın nüvə proqramı ilə bağlı son proseslərə toxunub və ABŞ ilə üç Avropa ölkəsinin — Böyük Britaniya, Almaniya və Fransanın — bu mövzudakı siyasi mövqelərini və addımlarını şərh edib.
Yaponiya Xarici İşlər Nazirliyinin açıqlamasına görə, Motegi İranın nüvə məsələsinin dialoq yolu ilə həllinin vacibliyini vurğulayaraq ABŞ–İran danışıqlarının mümkün qədər tez bərpa edilməsinin önəmini qeyd edib. O, həmçinin İranın Beynəlxalq Atom Enerjisi Agentliyi (BAEA) ilə tam əməkdaşlığı yenidən bərpa etməsinə çağırıb.
Hər iki nazir regional sülh və sabitliyin təmin edilməsi üçün Tokio və Tehran arasında müxtəlif səviyyələrdə yaxın dialoqu davam etdirmək barədə razılığa gəlib.
Motegi daha əvvəl 2019–2021-ci illərdə də Yaponiya xarici işlər naziri vəzifəsində çalışıb və 21 oktyabr 2025-ci ildə yenidən bu vəzifəyə gətirilib.