BAKI,AzerVoice, Orxan Qədirzadə
Qəzza zolağında fəaliyyət göstərən fələstinli səhiyyə qurumları 2023-cü ilin sonundan başlayaraq bölgədə ümumilikdə 6 min amputasiya əməliyyatının aparıldığını bildiriblər.
AzerVoice arabnews-a istinadən xəbər verir ki, amputasiya edilənlərin 25 faizini uşaqlar, 12,7 faizini isə qadınlar təşkil edir. Səhiyyə qurumlarının bildirdiyinə görə, hər iki qrupun uzunmüddətli reabilitasiya və psixoloji dəstəyə ciddi ehtiyacı var. Məlumata əsasən, tibbi avadanlıq, protez və yardımçı vasitələrin çatışmazlığı yaralıların müalicəsini çətinləşdirir və onların ailələrinin vəziyyətinə də təsir göstərir.
Səhiyyə müəssisələri beynəlxalq təşkilatları Qəzzada reabilitasiya xidmətlərinə və psixososial dəstək proqramlarına yardım etməyə çağırıblar.
Xatırladılır ki, oktyabr ayında İsrail və HƏMAS arasında atəşkəs barədə razılaşma əldə olunub. Fələstin tərəfi münaqişə dövründə 65 mindən çox şəxsin həlak olduğunu, onların əksəriyyətinin qadın və uşaqlar olduğunu açıqlayıb.
