BAKI, AzerVoice

İsrail ordusunda 18 ayda 279 intihar cəhdi qeydə alınıb

AzerVoice xəbər verir ki, İsrail Knessetinin (parlamentinin) Araşdırma və Məlumat Mərkəzi son 18 ay ərzində orduda 279 intihar cəhdinin qeydə alındığını, onlardan 36 hərbçinin həyatını itirdiyini açıqlayıb.

Məlumata görə, İsrailin 2023-cü ilin oktyabr ayında Qəzzaya qarşı hərbi əməliyyatlara başlamasından sonra ordu daxilində intihar hallarında ciddi artım müşahidə olunub. Mütəxəssislər bu vəziyyətin psixoloji təzyiq, travma və artan hərbi çağırışlarla əlaqəli olduğunu bildirir.

İsrailin “Haaretz” qəzeti də bu məlumatı təsdiqləyərək ordudakı psixoloji böhranın dərinləşdiyini yazıb.

Hesabatda bildirilir ki:

2017 – İyul 2025 aralığında ümumilikdə 124 hərbçi intihar edib.

Onların 68%-i məcburi xidmət dövründə, 21%-i ehtiyatda, 11%-i isə daimi hərbi xidmətdə olub. Araşdırma göstərir ki, intiharların 12%-i yüksək riskli, 88%-i orta riskli kateqoriyaya daxildir.

2023-cü ildən sonra ehtiyatda olan hərbçilər arasında intiharların kəskin artdığı, bunun isə Qəzza müharibəsi fonunda minlərlə hərbçinin yenidən xidmətə çağırılması ilə əlaqəli olduğu vurğulanır.