BAKI, AzerVoice, Səməd Əyyubov

İspaniyanın şimalındakı Bask bölgəsinin Sestao şəhərində keçirilməsi planlaşdırılan 40-cı “Basque Country Open” şahmat turnirində israilli şahmatçıların İsrail bayrağı ilə çıxış etməsinə qadağa qoyulub.

AzerVoice xəbər verir ki, bu qərar İsrailin Qəzza zolağında həyata keçirdiyi hərbi əməliyyatlara etiraz olaraq qəbul edilib.

İsrail isə buna cavab olaraq turnirdən çəkilmək qərarı verib.

Turnirin təşkilatçısı olan Sestao Şahmat Klubu iştirakçılardan ölkə bayraqları əvəzinə Dünya Şahmat Federasiyasının (FIDE) bayrağından istifadə etmələrini tələb edib.

Bu qərara həm İsrail, həm də FIDE etiraz edib. FIDE açıqlamasında təşkilatçılarla məsləhətləşmədiklərini, ölkələrə və bayraqlara qarşı ayrı-seçkiliyi pislədiklərini bəyan edib.

Gələn reaksiyalardan sonra təşkilatçılar əlavə qərar qəbul edərək turnirdə heç bir ölkənin bayrağına yer verilməyəcəyini, yalnız Bask bölgəsi və Fələstin bayraqlarının nümayiş etdiriləcəyini açıqlayıblar.

Qeyd edək ki, Rusiya-Ukrayna müharibəsi səbəbilə FIDE tərəfindən sanksiyalara məruz qalan Rusiya və Belarus şahmatçıları da beynəlxalq turnirlərdə yalnız neytral FIDE bayrağı altında çıxış edə bilirlər. Hər iki ölkənin milli komandalarının isə FIDE yarışlarına qatılmasına icazə verilmir.