BAKI, AzerVoice, Orxan Qədirzadə

Liviya mediasında ölkənin sabiq lideri Müəmmər Qəddafinin böyük oğlu Seyfülislam Qəddafinin öldürüldüyü barədə xəbərlər yayılıb.

AzerVoice xəbər verir ki, Liviya rəsmi xəbər agentliyi LANA-da yayılan məlumatda Seyfülislam Qəddafinin həyatını itirdiyi iddia edilib. Onun müşaviri və siyasi komandasının rəhbəri Abdullah Osman Seyfülislamın öldüyünü təsdiqləsə də, ölümün təbii səbəblərdən, yoxsa hücum nəticəsində baş verdiyi barədə detallar açıqlanmayıb.

Bununla yanaşı, Liviya daxilində fəaliyyət göstərən bəzi özəl media qurumları da Seyfülislam Qəddafinin öldürüldüyünü irəli sürüb. Paralel olaraq, Liviya Milli Birlik Hökumətinin Müdafiə Nazirliyinə bağlı 444-cü briqada yayılan iddiaları təkzib edib. Açıqlamada briqadanın Zintan bölgəsində hər hansı bölməsinin olmadığı və Seyfülislam Qəddafinin öldürülməsi ilə bağlı xəbərlərin həqiqəti əks etdirmədiyi bildirilib.

Qeyd edək ki, məsələ ilə bağlı rəsmi dövlət qurumlarından hələlik yekun və ətraflı təsdiqedici məlumat təqdim olunmayıb. Hadisə ilə bağlı qeyri-müəyyənlik qalmaqdadır.