Bakı, AzerVoice, Nailə Babazadə
Birləşmiş Millətlər Təşkilatı (BMT), İsrailin Qəzza şəhərində binaları hədəf almağa davam etdiyini bildirərək, dünəndən etibarən şimaldan cənuba doğru 10 mindən çox insanın məcburi köçkün edildiyini açıqlayıb.
AzerVoice xəbər verir ki, BMT Baş katibinin sözçüsü Stefan Düjarrik gündəlik mətbuat konfransında danışıb.
O bildirib ki, BMT-nin Humanitar Məsələlərin Koordinasiyası İdarəsinin (OCHA) əməkdaşları İsrail qüvvələrinin Qəzza şəhərində daha çox binanı bombaladığını qeyd ediblər.
“İsrail ordusu bu binaların vurulacağını elan etdikdən və insanlara cənuba getmələri göstərişi verdikdən sonra ailələr, hara gedəcəklərini bilmədən açıq ərazilərdə toplaşırlar.” - deyə Düjarrik qeyd edib
Düjarrik bildirib ki, dünəndən etibarən bütün şəhər məcburi köçürülmə əmri altındadır.
“Köçürülmə əmri vermək, münaqişə tərəflərini müharibə zamanı mülki şəxsləri qorumaq məsuliyyətindən azad etmir.” - deyə əlavə edib.
Düjarrik eyni zamanda, bir çox ailənin sağlamlıq, təhlükəsizlik və yüksək xərclər səbəbilə qaça bilmədiyini vurğulayıb.
“Beynəlxalq humanitar hüquqa əsasən, mülki şəxslər və mülki infrastruktur həmişə qorunmalı və heç vaxt hədəf alınmamalıdır.” - deyə Düjarrik qeyd edib.
Qəzzaya humanitar yardımın çatdırılması məsələsinə də toxunan Düjarrik bildirib ki, ərazidəki BMT humanitar yardım qrupları İsrailin davam edən maneələri səbəbilə mövcud humanitar yardım səviyyəsinin tamamilə qeyri-kafi olduğunu vurğulayırlar.
