BAKI,AzerVoice

ABŞ, Şərqi Türküstanda (Çinin Sintszyan-Uyğur Muxtar Rayonu) müsəlman uyğurların məcburi əməyə cəlb edilməsi ilə bağlı ittihamlar fonunda Pekinə qarşı təzyiqlərini artırıb. AzerVoice xəbər verir ki, ABŞ Daxili Təhlükəsizlik Nazirliyi Uyğurların Məcburi Əməyinin Qarşısının Alınması Qanununun (UFLPA) tətbiq olunduğu məhsullar siyahısını genişləndirib. Yeni qərara əsasən, siyahıya polad, mis, litium, kaustik soda və qırmızı xurma da əlavə edilib. Bu, Çindən idxal olunan məhsullara nəzarətin daha da gücləndirilməsi deməkdir.

Qanun 2022-ci ilin iyunundan qüvvədədir və indiyədək yüz milyonlarla dollarlıq məhsulun ABŞ-a idxalının qarşısını alıb. Reuters-in məlumatına görə, ABŞ Dövlət Departamenti 144 şirkət və təşkilatı “qara siyahı”ya salıb. Onların məcburi əməyin istismarı ilə birbaşa və ya dolayı yolla əlaqəli olduğu bildirilir.

Amnesty International və Human Rights Watch-in hesabatlarında qeyd olunur ki, uyğurlar sistematik şəkildə kənd təsərrüfatı və sənaye sahələrində — pambıq yığımından tutmuş litium hasilatına qədər — məcburi əməkdə işlədilir. Hüquq müdafiəçilərinə görə, işçilər ədalətli ödənişdən məhrum edilir, polis nəzarəti altında yaşayırlar.

Çin bu faktı inkar edir

Pekin isə ittihamları rədd edir və tətbiq edilən tədbirləri “ekstremizmlə mübarizə məqsədli peşə hazırlığı proqramları” adlandırır. Lakin BBC və The New York Times-ın müstəqil araşdırmaları uyğurlar üzərində mədəni təzyiq göstərildiyini, həmçinin onların islam və türk kimliyinin sıxışdırıldığını ortaya qoyur.