BAKI,AzerVoice
Almanya hökuməti, İsrailin Qəzzadakı hərbi əməliyyatlarına görə artan beynəlxalq tənqidlərə baxmayaraq, bu ölkədən pilotsuz uçuş aparatları (PUA) almaq üçün addım atır.
AzerVoice xəbər verir ki, Berlin İsraildən üç ədəd Heron TP tipli PUA almağı planlaşdırır.
Təxminən 1 milyard avro dəyərindəki müqavilə ilin sonuna qədər parlamentin təsdiqinə təqdim olunacaq. Paket yalnız PUA-ları deyil, həm də 20 ədəd Eurofighter qırıcı təyyarəsi, çox sayda tank və zirehli texnika sifarişini də əhatə edir.
Almaniya kansleri Fridrix Merts rəhbərliyindəki hökumət yaxın vaxtda Qəzzada istifadə oluna biləcək silah ixracatına məhdudiyyət qoyulacağını açıqlamışdı. Lakin Heron TP anlaşmasının bu qərarın xaricində saxlanılması Almaniyada həm ictimaiyyətdə, həm də siyasi dairələrdə mübahisə yaradıb.
Məlumata görə, Almaniya 2023-cü ilin oktyabrından 2025-ci ilin mayına qədər İsrailə təxminən 485 milyon avro dəyərində silah ixracına icazə verib.
Son sorğular göstərir ki, almanların 73 faizi İsrailə silah satışının məhdudlaşdırılmasını, 30 faizi isə tamamilə dayandırılmasını istəyir. Bu vəziyyət, Berlinin “tarixi məsuliyyət” arqumenti ilə İsrailə dəstəyini davam etdirməsi ilə ictimai tələblər arasında ciddi gərginlik yaradıb.