BAKI, AzerVoice, Nərmin Ağayeva
ABŞ-ın vitse-prezidenti J.D. Vance, prezident Donald Trampın səhhətinin “inanılmaz dərəcədə yaxşı” olduğunu, lakin “bir faciə” baş verərsə, prezidentlik vəzifəsini icra etməyə hazır olduğunu bildirib.
AzerVoice xəbər verir ki, Vance “USA Today” qəzetinə verdiyi müsahibədə, Trampın “venöz çatışmazlıq” diaqnozu və əllərindəki qançırlarla bağlı yaranan suallara cavab verib. O, Trampın qeyri-adi enerji ilə çalışdığını, komandanın ən uzun saatlar işləyən üzvü olduğunu vurğulayıb.
Vance, prezidentlik kürsüsünə keçməyə hazır olub-olmaması ilə bağlı suala, “Son 200 gündə aldığım təcrübədən daha yaxşı bir hazırlıq düşünə bilmirəm,” – deyə cavab verib. Bu açıqlama, Trampın səhhəti ilə bağlı sosial şəbəkələrdə yayılan görüntülər və müzakirələrdən sonra gəlib.
Ağ Evin mətbuat katibi Karoline Leavitt isə Trampın əllərindəki qançırların “tez-tez əl sıxma və aspirin istifadəsi” nəticəsində yaranan kiçik toxuma zədələnməsi olduğunu, prezidentin səhhətinin yaxşı olduğunu bildirib.
