BAKI, AzerVoice
Suriyada baş verən proseslər ciddi narahatlıq doğurur. Suriyada yeni hökumət qurulsa da, bəzən kəskinləşən mübarizə hələ də davam edir. Türkiyənin bu məsələyə reaksiyası isə diqqət mərkəzindədir. Suriyada vəziyyətin düzəlməsinə yardım etmək üçün Türkiyə ordusunun genişmiqyaslı hərbi əməliyyat aparacağı artıq real və gözlənilən bir haldır.
AzerVoice xəbər verir ki, əsələ ilə bağlı Crossmedia.az-a açıqlama verən “Türk Dünyası” (Turkic.World) media platformasının rəhbəri, siyasi şərhçi Rufiz Hafizoğlu Türkiyənin əməliyyatlara başlamasının qaçılmaz olduğunu bildirib: “Suriyanın şimalında Türkiyə ordusunun genişmiqyaslı hərbi əməliyyat aparacağı artıq real və gözlənilən bir haldır. Bu əməliyyatın hədəfi isə heç şübhəsiz ki, ABŞ-ın, İsrailin və Qərbin illərdir ‘İŞİD-ə qarşı mübarizə’ adı altında dəstəklədiyi, hazırda ‘Suriya Demokratik Qüvvələri’ (SDQ) adlanan, lakin mahiyyət etibarilə PKK terror təşkilatının Suriyadakı qolu olan silahlı birləşmələr olacaq. Bu qarşıdurma qaçılmaz görünür.
Əsas səbəblərdən biri odur ki, Suriyanın şimalında, eləcə də Türkiyənin cənubunda fəaliyyət göstərən hər hansı qeyri-qanuni silahlı qruplaşma nə Türkiyənin, nə Suriyanın, nə də regiondakı digər dövlətlərin maraqlarına xidmət edir. Digər mühüm məqam isə Suriyanın dövlət kimi unitar quruluşunu qoruyub saxlaya bilmədiyi təqdirdə bu təhlükənin Türkiyəyə də keçə biləcəyidir. Ankara uzun illərdir bu riski izləyir və xəbərdarlıq edir.”
Siyasi şərhçi həmçinin Suriyada hazırda maraqlı və olduqca ciddi narahatlıq doğuran bir vəziyyətin yarandığını vurğulayıb: “Bununla yanaşı, bölgədə maraqlı bir vəziyyət yaranıb: ABŞ tərəfindən dəstəklənən SDQ-nin varlığı və Türkiyənin əməliyyata qoşulması əslində İranın maraqlarına uyğun gəlir. Suriyada vəziyyətin gərginləşməsi ilk növbədə İsrailin və İranın geosiyasi maraqlarına xidmət edir. İran hazırkı qarşıdurmadan, SDQ-nin mövcudluğundan, silahlanmasından və bölgədəki xaosdan istifadə edərək öz nüfuzunu artırmaq niyyətindədir. Lakin bunun reallaşması ehtimalı azdır.
Nəticə etibarilə, bölgədə genişmiqyaslı müharibə qaçılmazdır və Türkiyə bu münaqişədə fəal iştirak edəcək. Risklər son dərəcə yüksəkdir. Hətta bir-birinə düşmən mövqedə olan qüvvələrin belə bu məsələdə eyni mövqedən çıxış etməsi vəziyyətin nə qədər mürəkkəb və narahatedici olduğunu göstərir.”