BAKI, AzerVoice
İran, ABŞ və İsrail tərəfindən yeni bir hücum baş verəcəyi təqdirdə, buna tərəddüdsüz və qətiyyətli cavab verəcək və bu cavabın nəticələrini gizlətmək mümkün olmayacaq.
AzerVoice xəbər verir ki, bu sözlər İranın xarici işlər naziri Seyid Abbas Əraqçinin verdiyi bəyanatda yer alıb.
"İran, son ABŞ-İsrail təcavüzü zamanı baş verənləri, o cümlədən bizimlə yanaşı rəqiblərimizə qarşı həyata keçirilmiş zərbələrin miqyasını dəqiq bilir. Bu hücumlar hələ də tam şəkildə açıqlanmayıb. Əgər bu təcavüz təkrar olunsa, biz tərəddüdsüz və daha qətiyyətli şəkildə cavab verəcəyik və bu cavab gizlədilə bilməyəcək" - deyə, Əraqçi qeyd edib.
Nazir, həmçinin bildirib ki, 12 günlük müharibə zamanı ABŞ və İsrail İranın nüvə obyektlərinə zərbə endirə bilsə də, bu, ölkənin uranı zənginləşdirmə əzmini zəiflədə bilməyib.
“Çoxsaylı insan səyləri ilə yaradılmış texnologiya və elmi biliklər bir neçə bomba ilə məhv edilə bilməz” – deyə, Əraqçi vurğulayıb.
Bundan əvvəl, ABŞ Prezidenti Donald Tramp bəyan etmişdi ki, əgər İran yenidən nüvə obyektlərini bərpa etməyə çalışsa, Vaşinqton həmin obyektlərə yeni zərbələr endirməyə hazırdır.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək rütbəli hərbçi, o cümlədən İran Silahlı Qüvvələrinin Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər həlak olub. İran BMT Təhlükəsizlik Şurasının hadisə ilə əlaqədar fövqəladə iclas çağırılmasını istəyib.
Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.
İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.