BAKI,
AzerVoice
İsrailli məhbuslar yalnız müqavimətin şərtləri ilə azad
olunacaq.
AzerVoice xəbər verir ki, HƏMAS israilli məhbusların yalnız müqavimətin irəli sürdüyü şərtlərlə azad ediləcəyini bəyan edib.
HƏMAS Siyasi Bürosunun üzvü İzzət ər-Rişk Telegram hesabında paylaşdığı açıqlamada bildirib ki, "Netanyahunun əsirlərin geri qaytarılması və HƏMAS-ın təslim olması çağırışları reallıqdan uzaqdır və İsrailin psixoloji məğlubiyyətini ört-basdır etmək məqsədi daşıyır".
Rişk qeyd edib ki, İsrail rəsmiləri hərbi vasitələrlə məhbusları azad edə bilmədiklərini qəbul etdikdən sonra onların yalnız ciddi bir razılaşma qarşılığında azad edilə biləcəyi aydın olub. "Qəzza təslim olmayacaq. Şərtləri müqavimət müəyyən edəcək" -deyə o bildirib.
İsrailin baş naziri Benyamin Netanyahu X platformasında verdiyi açıqlamada Qəzzadakı hərbi kampaniyanın əsas məqsədlərinin HƏMAS-ın hərbi və inzibati imkanlarını tamamilə məhv etmək, israilli məhbusları azad etdirmək və Qəzzanı İsrail üçün təhlükə mənbəyindən çıxarmaq olduğunu bildirib. O qeyd edib ki, “HƏMAS artıq mövcud olmamalıdır”.
Digər tərəfdən, Fələstin Səhiyyə Nazirliyindən verilən məlumata görə, İordan çayının qərb sahilində yerləşən Nablus şəhərindəki Əskər əl-Cədid Qaçqınlar Düşərgəsində İsrail əsgərlərinin atəşi nəticəsində 12 yaşlı fələstinli uşaq – İyad Abdulmuti Şelahti həyatını itirib.
Qeyd olunur ki, İsrailin 2023-cü il oktyabrın 7-dən etibarən Qəzzaya başladığı hücumlar fonunda İordan çayının qərb sahili və Şərqi Qüdsdə də reydlər, həbslər və zorakılıq hallarında ciddi artım müşahidə olunur. Həlak olan fələstinlilərin ümumi sayı 993 nəfərə çatıb.
