BAKI, AzerVoice – Səudiyyə Ərəbistanının vəliəhd şahzadəsi və Baş nazir Məhəmməd bin Salman, çərşənbə axşamı günü Ciddədə yerləşən Salam sarayında İranın xarici işlər naziri Abbas Əraqçi və müşayiət edən nümayəndə heyətini qəbul edib. Görüşdə regiondakı son vəziyyət və bu istiqamətdə aparılan səylər müzakirə olunub.
AzerVoice xəbər verir ki, tərəflər, eyni
zamanda, Səudiyyə Ərəbistanı ilə İran arasındakı ikitərəfli
münasibətləri nəzərdən keçiriblər.
Vəliəhd şahzadə Məhəmməd bin Salman, görüş zamanı ölkəsinin atəşkəs
razılaşmasının bölgədə təhlükəsizlik və sabitliyin
möhkəmləndirilməsi üçün şərait yaradacağına ümid bəslədiyini
bildirib. O, həmçinin münaqişələrin həlli üçün diplomatik dialoqun
yeganə doğru yol olduğunu vurğulayıb.
İranın xarici işlər naziri Abbas Əraqçi öz növbəsində Səudiyyə Ərəbistanının İsrailin hücumlarını pisləməsinə verdiyi dəstəyə görə təşəkkürünü bildirib və bölgədə təhlükəsizlik və sabitliyin təşviqi istiqamətində vəliəhd şahzadənin səylərini yüksək qiymətləndirdiyini qeyd edib.
Görüşdə Səudiyyə tərəfindən müdafiə naziri şahzadə Xalid bin Salman, xarici işlər naziri şahzadə Feysəl bin Fərhan və nazirlər şurasının üzvü, milli təhlükəsizlik üzrə müşavir Müsəid əl-Əyban da iştirak ediblər.
