BAKI, AzerVoice, Səməd Əyyubov
Türkiyədən “Qlobal Sumud Flotiliyası”na qoşulacaq aktivistlər bu gün yola çıxır.
AzerVoice xəbər verir ki, türk aktivistlər əvvəlcə Tunisə hərəkət edəcəklər. Qəzzaya ərzaq və humanitar yardım aparmaq, həmçinin tətbiq olunan blokadanı yarmaq məqsədilə bütün hazırlıqlarını tamamlayan flotiliya üçün gözlənilən gün çatıb.
“Azadlıq Flotiliyası”nın davamı olan “Qlobal Sumud Flotiliyası” Qlobal Qəzza Hərəkatı, Sumud Karvanı və Malayziya Sumud Nusantara təşkilatlarının birləşməsi ilə formalaşıb və onlarla gəmi ilə Qəzzaya doğru hərəkət edəcək. Flotiliyanın əsas məqsədi Qəzzaya humanitar yardım çatdırmaq, qanunsuz blokadanı yarmaq və beynəlxalq ictimaiyyətin diqqətini fələstinlilərin üzləşdiyi humanitar böhrana cəlb etməkdir.
44 ölkədən minlərlə aktivistin iştirak etdiyi flotiliya İsrailin Qəzzaya tətbiq etdiyi blokadanı yarmaq üçün bu gün İspaniyadan, sentyabrın 4-də isə Tunisdən yola çıxacaq. Türkiyə nümayəndə heyəti də bu gün Tunisə hərəkət edir və sentyabrın 4-də oradan Qəzzaya doğru yola davam edəcək.
Yardım flotiliyasına daxil olan gəmilər artıq Barselona limanından çıxıblar. Barselonadan sonra İtaliya, Yunanıstan və Tunisdən Aralıq dənizinə açılacaq təxminən 20 gəmi və 300-dən çox iştirakçı arasında aktivistlər, sənətçilər, siyasətçilər, həkimlər və jurnalistlər də yer alır.
Fələstin Səhiyyə Nazirliyinin məlumatına görə, Qəzza zolağında son 24 saat ərzində 88 nəfər həlak olub, 421 nəfər isə yaralanıb. Bununla da müharibənin əvvəlindən bəri ölənlərin ümumi sayı 63 min 459 nəfərə çatıb.
Nazirliyin açıqlamasına əsasən, İsrail ordusunun atəşkəsi pozaraq martın 18-dən bəri həyata keçirdiyi hücumlarda 11 min 328 nəfər həlak olub, 48 min 215 nəfər isə yaralanıb. Son 24 saatda humanitar yardım gözləyən insanların hədəfə alındığı hücumlarda 30 nəfər ölüb, 166 nəfər yaralanıb.
