BAKI, AzerVoice, Nərmin Ağayeva

Türkiyə Bütün Əczaçılar İşəgötürənlər Həmkarlar İttifaqının (TEİS) sədri Nurten Saydan dərmanların düzgün saxlanma şərtlərinin əhəmiyyətini vurğulayaraq, yanlış tətbiqlərə qarşı xəbərdarlıq edib.

AzerVoice xəbər verir ki, Saydan verdiyi açıqlamada, dərmanların yüksək rütubətli və ya temperatur dəyişikliyinə məruz qalan yerlərdə, məsələn, vanna otağında və ya avtomobillərdə saxlanılmasının zərərli olduğunu bildirib.

O, dərmanların tövsiyə olunan temperatur diapazonundan kənarda saxlanmasının effektivliyini azaltdığını və hətta zərərli ola biləcəyini qeyd edib. İnsulin, maye antibiotiklər və göz damcıları kimi dərmanların soyuducuda, lakin birbaşa buz paketləri ilə təmasda olmadan saxlanılmalı olduğunu vurğulayan Saydan, dondurucuya qoyulan dərmanların xarab olduğunu və istifadəyə yararsız hala gəldiyini əlavə edib.

Qeyd edək ki, dərmanların effektivliyini qorumaq üçün dərman şkaflarında və ya şüşə şkaflarda, sabit temperaturda saxlanması tövsiyə olunur. Əczaçıların göstərişlərinə əməl etmək sağlamlıq üçün vacibdir.