BAKI, AzerVoice, Fərid Mikayılov

Almaniya hökuməti vətəndaşlarını İrandan təcili çıxmağa çağırıb.

AzerVoice xəbər verir ki, Almaniya Xarici İşlər Nazirliyi xəbərdarlıq edib ki, Berlinin, həmçinin Fransa və Britaniyanın İranın nüvə proqramına görə BMT sanksiyalarının yenidən tətbiqi üçün başladığı prosesə cavab olaraq Tehran əks tədbirlər görə bilər.

“İran rəsmiləri dəfələrlə bu addımın nəticələri barədə xəbərdarlıq ediblər. Almaniya vətəndaşlarının və maraqlarının İranda mümkün cavab tədbirlərindən təsirlənməsi istisna deyil”- deyə bildirilib.

Nazirlik əlavə edib ki, hazırda Almaniyanın Tehrandakı səfirliyi yalnız məhdud konsulluq xidmətləri göstərə bilir.

Britaniya, Fransa və Almaniya cümə axşamı günü İranın nüvə proqramı ilə bağlı BMT sanksiyalarını bərpa etmək üçün 30 günlük mexanizmi işə salıb. Bu addım diplomatik təzyiqləri daha da artırmaqla yanaşı, bölgədə yeni gərginlik risklərini gündəmə gətirib.

Berlinin xəbərdarlığı Almaniya vətəndaşlarının təhlükəsizliyinə birbaşa diqqət çəkir. Rəsmi açıqlamaya görə, Alman vətəndaşlarının ölkəni tərk etməsi onların mümkün risklərdən qorunması üçün vacib addım hesab olunur.