BAKI, AzerVoice, Səməd Əyyubov
İsrailin baş naziri Benyamin Netanyahu açıqlayıb ki, ordusu HƏMAS-ın silahlı qanadı olan “İzzəddin əl-Qəssam Briqadaları”nın sözçüsü Əbu Ubeydəni hədəf alan hücum həyata keçirib.
AzerVoice xəbər verir ki, Netanyahu bu barədə bazar günü etdiyi çıxışında danışıb.
“Ümid edirəm ki, o artıq aramızda deyil” - deyə, Netanyahu bildirib.
Lakin HƏMAS hələlik Əbu Ubeydənin öldüyü barədə məlumatı təsdiqləməyib.
Qeyd edək ki, Fələstin Səhiyyə Nazirliyinin açıqlamasına görə, son 24 saatda İsrailin Qəzza zolağına hücumları nəticəsində 88 nəfər həlak olub, 421 nəfər yaralanıb. Bununla da müharibənin əvvəlindən ölənlərin ümumi sayı 63 min 459 nəfərə yüksəlib.
Nazirlik əlavə edib ki, İsrail ordusunun martın 18-dən bəri atəşkəsi pozaraq davam etdirdiyi hücumlarda indiyədək 11 min 328 nəfər ölüb, 48 min 215 nəfər yaralanıb. Son 24 saatda humanitar yardım gözləyənlərin hədəfə alındığı zərbələrdə isə 30 nəfər həlak olub, 166 nəfər yaralanıb.
